Hvernig munum við standa að rannsókninni?
Í upphafi rannsóknar munum við bæta við fyrirliggjandi megindleg gögn með matslistunum KIDSCREEN-27 og PEM-CY. Sjónum verður beint að börnum með ýmsar þroskaraskanir og skynskerðingar, svo sem varðandi sjón og heyrn. Við söfnum einnig upplýsingum um ófötluð börn í samanburðarhópi og notum tölfræðiaðgerðir til að bera saman tölulegar niðurstöður um hópana tvo.
Síðari hluti rannsóknarinnar felur í sér tilviksathuganir (e. case studies) með völdum hópi fatlaðra barna. Þar verður upplýsinga aflað með opnum viðtölum við börnin, foreldra þeirra og aðra lykilaðila. Einnig verða þátttökuathuganir á heimilum barnanna, í skólum þeirra og nærsamfélagi. Við munum greina gögnin ítarlega til að skilja betur líf og líðan barnanna og kalla fram reynslu þeirra og forgangsröðun.
Rannsóknin hefur hlotið samþykki Vísindasiðanefndar á Heilbrigðisvísindasviði (16-187).